Stolt.

Jau, ik bün je neet altied so klook as ik utsehn doo. Güstern, ehr an d‘ Mörgen, harr ik’n Termin bi d‘ Kusendokter. Dat was al de Twede, verleden Week harren’s mi en Füllen maakt un bünd d’r neet heel klaar mit worden. Daarum sull ik güstern noch maal komen, daar wullen se de Füllen „utarbeiden“. Un dat sull heel gau gahn, hebben’s tegen mi seggt.

Kiek. Un denn satt ik d’r weer bi de beid lüttje Studentskes up d‘ „Gynäkologenstohl“ (de Studenten maken dat billiger as en utwussen Dokter un de Kass betaalt vandag ja nix mehr), un daar meenden se: „Heer Bosse, wo Se daar je al bünd, denn könen wi je ok noch een van de lüttjeder Steden maken, waar en Füllen hen sall. Dat geiht ok leep gau un deit bold neet sehr. Dat is blot so heel’n bietje wat boverst up de Kuus.“

„Jo“, doch ik. Waar ik daar al bün, sallen’s dat man ok maken. „Un wenn’t neet sehr deit“, so doch ik wieder, „denn bruuk ik ok kien Betäuben.“ Denn as ik verleden Week en Betäuben kregen harr, daar was ik de hele Dag van d‘ Padd off un dat wull ik neet weer, umdat ik för’n Klasuur lehren mussd.

Up Stee, ik kreeg also kien Betäuben.

Dat was neet de best Gedacht, de ik de lesde Tied harr, mutt ik seggen. Vlicht leeg dat daar an, dat ik fröh an d‘ Mörgen noch neet so denken kann, vlicht hebb ik mi sülvst ok blot för harder hollen as ik bün. Denn dann mussd ik marken: dat deit doch sehr. Un wo dat sehr dee. Harrijasses nee.

Ik harr natörelk alltied seggen kunnt: „Ollskes, nu is’t vörbi mit ‚d Uthollen, geeft mi man doch so’n Spritz. Un twars en Groten, allens wat ji van dat Tüüg daar hebben. Ik will achteran de Engelkes singen hören“ Man dat hebb ‚k neet daan, daar kummt dann doch mien Stolt för. De sülvke Stolt, wat mi neet in’n Buss instiegen lett, wenn de to full is. Un de sülvke Stolt, wat mi in d‘ Mensa de „Gemüsesticks“ eten lett, wenn de Rieg bi dat Cordon Bleu to lang is.

Un so harr ik güsten kien Betäuben un ok kien Cordon Bleu. Free na mien oll Geschichtsmester: „Een kunn dat seker as Stolt beteken. Ik dee dat dat as Dummheid beteken, man een kunn dat as Stolt beteken…“

5 Comments

  1. m4rten

    Ich war am Mittwoch beim Zahnarzt. Die Behandlung dauerte in etwa zehn Minuten. Zitat: „auergewhlich gut gepflegt und alles in bester Ordnung.“
    Glck gehabt.

  2. Jan G.

    „Seitdem die Spange raus ist“ – Alter! Da bin ich ja hufiger da gewesen, und ich finde Zahnrzte schon zum Frchten.

Schreibe einen Kommentar

Deine E-Mail-Adresse wird nicht veröffentlicht.

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.